गोम बिक्रमका ५ चोटिला मुक्तकहरू
(ढाकिँदैन तिम्रा फर्जीका कुरा )
मुक्तक -१
कर्मशीलका मुहारभरी, मुजै- मुजा भएको छ
समृद्ध देश देख्ने चाह, धुजै-धुजा भएको छ
इमान्दारको बदख्वाइँ गरी, भ्रष्टहरूले रजाइँ गरी
देश विरुद्ध लाग्नेको नै, पूजै-पुजा भएको छ ।
मुक्तक -२
गर्दै नगर्नेको भजन र, नारा सिद्धान्त घोक्नुपर्याछ
अपराधी वा वापती हुन्, पहुँच छ र बोक्नुपर्याछ
थुकेको थुक चाटिएन, आफूले कहिले ढाँटिएन
अगाडी, माथि चम्चे पुग्दा, आफूले सलाम ठोक्नु पर्याछ ।
मुक्तक -३
आदर्श, नीति अनुशासन, सिकाउँथ्यौ उस्तै अर्जीका कुरा
धनमा गाँठो परेपछि त, थालेछौ आफ्नै मर्जीका कुरा
मास्तिर ढाके तल्तिर ह्वाङ्गै, तलतिर ढाके माथि छ्याङ्गै
ढाकेर कत्ति ढाकिँदैन, शायद तिम्रा फर्जीका कुरा ।
मुक्तक -४
बदलिँदैन झट्ट विश्वास, देशकै सत्ता धानेकासँग
भरोसा लाग्छ जे गरे नि, हृदयले आफ्नै ठानेकासँग
मस्त छौँ हामी अन्धभक्त, चुसिँदा आफ्नै जीउको रक्त
कसले बाजी मार्न सक्नु ?, छक्कापञ्जा जानेकासँग ।
मुक्तक -५
कसम खान्छ उसैले जो, सबैभन्दा झुट छ हजुर
भित्र बाहिर कुरा मिले, जे गरे नि छुट छ हजुर
आफै उत्पात गनाएर, जनता भेडो बनाएर
देशै बेची खान्छन् यहाँ, सारा ब्रह्मलुट छ हजुर ।
गोम बिक्रम कल्लाबारी, पाल्पा । २०७७ साल मंसिर ७गते