आखिर अहम् केका लागि ?
लक्ष्मी नेपालका ५ मुक्तकहरू
मुक्तक – १
बाँचुन्जेल के के भोग्नु पर्छ भन्न सकिन्न
समयले कुन दिन घात गर्छ भन्न सकिन्न
उज्यालो भविष्य सम्झेर मेहनत गर्दा-गर्दै
कुन दिन आफ्नै जीवन मर्छ भन्न सकिन्न ।
मुक्तक -२
थाती राखी आफ्ना रहर, बुझाएका छन्
बेचेर आफ्नै जग्गा घर, बुझाएका छन्
जनताको पीडा नबुझ्ने नामर्द सरकारलाई
जनताले आफ्नै लाशको कर बुझाएका छन् ।
मुक्तक -३
समस्या हुँदा मिलेर जुध्न सके विभेद हुँदैन
मान्छे मान्छे एक भनेर बुझ्न सके विभेद हुँदैन
सबैले आफ्नो मनबाटै व्यवहार परिवर्तन गरी
सबैलाई मान सम्मान गरी पुज्न सके विभेद हुँदैन ।
मुक्तक -४
छोडेर सधैँ अरुकै भरमा, नबिर्सिदिनुहोला
जिन्दगीको कुनै पनि प्रहरमा, नबिर्सिदिनुहोला
तपाईँहरू देश-विदेश जहाँसुकै हुनु भए पनि
वृद्ध आमा-बा हुनुहुन्छ घरमा, नबिर्सिदिनुहोला ।
मुक्तक – ५
सबैले छोड्नै पर्छ यो जमिन, आखिर अहम् केका लागि
गम्भीर भई सोच्नुहोस् एकछिन, आखिर अहम् केका लागि
तेरो मेरो भनी झगडा गरेको देखेर अचम्मित छु म आफैं
एउटै घाटमा जल्नुछ एकदिन, आखिर अहम् केका लागि ।
– सुनसरी ।