गजल

    -लेखनाथ खनाल “अंकुर”

ढुङ्गाको मूर्ति पूजी धार्मिक हुन खोज्छु म

गङ्गामा बगेको पानीले पाप धुन खोज्छु म

अस्तव्यस्त छु आफैँ,भ्याउँदिन स्याहार गर्न

आश्रममा बा-आमाको पाउ छुन खोज्छु म

आफैँ दुखी छु, नाना थरी व्यथा छन् मनमा

तैपनि ती दु:खी मान्छे देखेर रुन खोज्छु म

यथार्थ लुकाएर हिँडेको छु यता स्वाङ पार्दै

पित्तलमा जलप लगाएको सुन खोज्छु म

मेरो स्वार्थमा केही हेर्दिन दायाँबायाँ अहँ

जसलाई घात गर्छु उसै सँग गुन खोज्छु म

कता कता अल्मल छु साँघुरो बन्द कोठामा

अनि रातमा टल्टल चम्किने जून खोज्छु म

हज्जारौं पशुको बलि चढाएर मन्दिरमा

अन्नमा कहीँ भेट्छु कि भनी घुन खोज्छु म !!

अर्जुनचौपारी -६ दरौं, स्याङ्जा !