गजल – पुष्पा धमला
तिम्रो घरको आगनीमा जब पाइला टेकी दिएँ
हाम्रो माया बचाउनलाई मैले खुशी सुम्पिदिएँ ।
मेरो दुःख पोख्ने बेला जब तिमी टाढा थियौ
एउटै माध्यम चिठ्ठी पत्र पठाउन लेखी दिएँ ।
मन्दिर गए खुशी माग्न भगवानलाई नदेखेर
ढुङ्गा माथि चढाउने अपाङ्गलाई भेटी दिएँ ।
बुढा,बुढी,आमा,बालाई लगाएर मेरो जिम्मा
गयौ तिमी धेरै टाढा मैले घर संसार हेरी दिएँ ।
जेनतेन गुजारा नि अहिले सम्म धानेकै छु
दुःख जति कुल्चिएर मुस्कुराउँदै खेली दिएँ ।।
प्रकाशित मिति: २०७७ साल साउन १३ गते मंगलवार