गजल
– नमिता दवाडी
मेरो देशले कैयन बहादुर जन्माएको छ
जीवन बढारेको छ, घर भत्काएको छ,
दुख पखाल्नै होला ,नदी बौलाएको छ ।
म मरे तातो माटोमा चिन्ता नगर खाडी ,
मेरो देशले कैयन बहादुर जन्माएको छ ।
मान्छेले होइन, समयले रहेछ रङ्ग बदल्ने ,
हिजो प्रेमी , आज पागल बनाएको छ ।
अड्डा अदालत के गर्नु , के जोड्नु साक्षी ,
के मिल्ला न्याय , मनले मन दुखाएको छ ।
बन्दुक एकोहोरो हेर्छन् विधवा आँखाहरू ?
लाग्छ गोलीमै उनको खुसी हराएको छ ।
गोर्खा नेपाल (हाल ,न्युजिल्यान्ड)
प्रकाशित मिति :२०७७ साल साउन १२ गते सोमवार