सस्तो चल्दैन सौखिन छ,मुलुकको विलासे राजनिती
– लक्ष्मण चौलागाईं विद्रोही
हेरेँ जुगल, गौरिशंकरको, मनमोहक सुन्दर दृश्य ,
चिसो सिरेटोमा रातले,बनाइदियो भयो सबै अदृश्य ।
हिमालका पङ्क्तिहरू, आहा ! मिलेका दन्त सरी,
कति मज्जाले हासेकी छिन् ,आहा हाम्री प्रकृति ।
तर रोइरहेको छ देश, नियाल्दै यी अमूल्य सम्पत्ति ,
अलपत्र छ दर्दनाक कथा ,होला यो कसको नियति ।
आँखाबाट बर्र अश्रु ,बलिन्द्र झर्यो चेहरा भरी ,
तप्प तप्प चुहियो आँसु, च्यातिएको भोटो भरी ।
घरैपिच्छे छैनन् कोही,प्रवासिए लाखौं युवायुवती,
सस्तोमा बेच्दै पसिना, पठाउँछन् रेमिटेन्स भर्नलाई ढुकुटी ।
विदेशबाट लास ल्याउन, समेत छैन कुनै सहानुभूति ,
दयनीय बन्दै गयो शासक, रित्याउँदै राज्यको ढुकुटी ।
यस्तै छ हजुर, हँसिलो हिमालको रोइरहेको दुर्गति ,
सस्तो चल्दैन सौखिन छ, मुलुकको विलासे राजनीति ।
प्रकाशित मिति :२०७७ असार २९ गते सोमवार