गजल
– अन्जान श्रेष्ठ
बहर ए मुजारे
अखरब रुक्न : २२१ २१२२ २२१ २१२२
आफन्तका चिनारी यसरी पो आइदिन्छन्
झिल्को निभाउँ भन्दै आगो लगाइदिन्छन्
सुन्ने भए यथार्थ दुश्मनहरूको सुन्नुस्
आफ्नाहरू त चिल्ला गुणगान गाइदिन्छन्
कर्के नजर लगाउँछन् दु:खी दरिद्र देखे
निर्जीव शिला पुजेर देउता बनाइदिन्छन्
मन स्वच्छ राख्नेलाई संसार स्वच्छ देख्छ
प्रतिविम्ब हेरि व्यर्थै ऐना फुटाइदिन्छन्
कहाँसम्म अन्धभक्त बन्ने खुबी रहेछ ?
नुनकै सोझोको खातिर घरबार डुबाइदिन्छन्
पीडा सुनाउँछ पीडित सुनुवाइ हुन्छ ठानी
माछो र भ्यागुताको खेल झैं बनाइदिन्छन्
( तनहुँ दमौली )
प्रकाशित मिती २०७४ साल श्रावण ३२ गते, बुधबार