कविता – रक्तपिपाशु
– दीपशिखा शर्मा
हो …………..! होश सम्हाल्दा उ एक्लै थियो ।
बिरानो संसारबाट अन्जान, बेखवर !
बाबु बितिसकेका थिए
आमा पराया पुरुषलाई अँगालेर,
सुँईकुच्चा ठोकिसकेकी थिइन् ।
उ नितान्त एक्लो,
बाबु आमा नभएको टुहुरो केटो
उसको हेरचाह गर्न खटिएका थिए,
वृद्ध हजुरआमा र हजुरबुबा !
जो डाँडामाथिका जुन झैँ भइसकेका थिए ।
न बालापन ,न कुनै खुसी
अकालमै बुढ्यौलीले छोएजस्तो !
निरस फुस्रो निरीह एवं बेसाहरा जीवन,
वास्तवमा उसको लागि घर घरजस्तो थिएन ।
स्कुल स्कुलजस्तो थिएन ।
बिना बाबुको टुहुरो केटो
न स्कुल ड्रेस ,न कापी कलम ,न झोला ,न खाजा
मैलिएका लुगा,न खुट्टामा जुत्ता !
तुना बाँधेर अड्याएको थोत्रो चप्पल ।
उसको लागि स्कुल सिर्फ एक बाध्यता थियो ।
हजुरबा हजुरआमाको आँखा कान छल्ने एउटा बाटो मात्रै ।
न आत्मबल , न कुनै उत्सुकता
न पढाइमा लगनशीलता !
पढ्न भनेपछि जिउबाट खलखली पसिना छुट्थ्यो ।
शिर उँचो पारेर हेर्नसक्ने तागत समेत थिएन
त्यसैले त जहिले शिर निहुर्याएर,
पछिल्लो बेन्चमा झोक्रिएर बस्थ्यो ।
उसको बारेमा न त शिक्षकले कुनै चासो लिन्थे
न त साथीहरू नै उसको नजिक पर्थे ।
फोहर सर्ने डरले सबै उ सँग टाढा बस्थे ।
पढ्नु गुन्नु केही थिएन
रित्तो झोला लिएर घर फर्किन्थ्यो ।
कठै ! भगवान् पनि कति निष्ठुरी ?
साँझ बिहानको खाना बल्लतल्ल नसिव हुन्थ्यो ।
उसको जीवन अत्यन्त कष्टकर बन्दै गयो ।
समय बद्लिंदै गयो
सबैबाट हेपिएको टुहुरो केटो
बिस्तार बिस्तार हुर्कँदै बढ्दै गयो ।
कनिकुथि एसएलसी पास गर्यो ।
त्यसपछि कामको सिलसिलामा काठमाण्डौं छिर्यो ।
त्यहाँ नाम मात्रको कलेज भर्ना गर्यो ।
अनि कामको खोजीमा यत्रतत्र भौँतारिन थाल्यो ।
उसको मनमा बालकालदेखि नै ,
अनौठो बदलाको भाव उब्जिएको थियो ।
किनकि उ समाजबाट घृणित थियो ,
छरछिमेकबाट बहिष्कृत थियो ,
आफन्तजनबाट हेपिएको थियो ।
दुनियाँको अगाडि उसलाई केही गरेर देखाउनु थियो ।
मेहनत नै नगरी अथाह धन दौलत कमाउनु थियो ।
उसको अगाडि शहरी चमकदमक देखापर्न थाल्यो ।
हिरो हिरोइनको नक्कली रंगीन दुनियाँ ,
बिलासी जीवन तथा शान शौकतबाट
उ यति प्रभावित भयो कि,
त्यसैले उ पनि एक कलाकार बन्ने निधो गर्यो ।
एउटा कमेडियन कलाकार !
जसको काम नक्कली हाँसो हाँसेर,
दर्शकलाई मनोरञ्जन दिनहुन्थ्यो ।
बिस्तार बिस्तार उसले टेलिसिरियल लगायत म्युजिक भिडियोमा
छोटो मोटो रोल गर्दे पेट पाल्ने काम गर्न थाल्यो ।
अब उ टुहुरो ‘सेते’ थिएन
लक्का जवान ‘सेते डन’ बनिसकेको थियो ।
बिस्तार बिस्तार उसले ,
तरुनी केटीहरूलाई आफ्नो वशमा पार्न थाल्यो ।
काठमाण्डौं की नेवारनी पट्टयायो ।
उसैसँग बिहे गर्यो ,सन्तान जन्मायो ।
तैपनि उसको मन भरिएन ।
उ अमिर बन्न चाहन्थ्यो ।
उसको लागि श्रीमतीको पवित्र सम्बन्ध भन्दा,
धन दौलत प्यारो थियो
जसको लागि उसले युवतीहरू फँसाउने,
धित नमरुन्जेल प्रयोग गर्दै छोड्दै गर्न थाल्यो ।
नेवारनी , बाहुनी , क्षेत्रीनी ,गुरुङनी उसका अर्धाङ्गिनीहरु बन्दै गए ।
उसको ठगी धन्दामा सघाउँदै गए ।
युवतीहरूसँग सम्बन्ध गाँस्नुको एक मात्र मकसद थियो पैसा !
जसका लागि उ मर्न र मार्न समेत पछि पर्दैनथ्यो ।
उसका असंख्य महात्वाकांक्षाहरु आकाशको बादल झैँ
यत्रतत्र मडारिइरहेका थिए ।
पैसाको प्यासले उसलाई यति सताएको थियो कि ,
उ छिट्टै करोडपति बन्न चाहन्थ्यो ।
जसको कारण उ फिल्मी दुनियाँमा अगाडि बढ्दै गयो ।
केही मूर्खहरूलाई मुर्गा बनाई हातमा लियो ।
लगानी तिनीहरूलाई गर्न लगाउने र,
आफू मोजमस्तिमा रम्न थाल्यो
जसको फलस्वरूप उसको फिल्मैपिच्छे,
नयाँ नयाँ अनुहारका श्रीमतीहरू थपिँदै गए ।
उसको खराब आचरणको कारण,
उसले बनाएको फिल्महरू क्रमशः फ्लप हुँदै गए ।
फिल्मी टिमको अगाडि,
उ नितान्त एक्लो र निरीह बन्न पुग्यो ।
अन्ततः गाउँको सोझो टुहुरो केटो,
एकाएक बद्लिएर रक्तपिपाशु ‘सेते’ बन्न पुग्यो ।
मातृभूमिमा पाइला राख्न कठिन हुँदै गएपछि ,
घर परिवार सबैलाई त्यागी प्रवास हान्नियो र भूमिगत भयो ।
तरपनि उ भित्रको प्यास मरिसकेको थिएन,पैसाको प्यास !
प्रवासमा रहेर उसले थप अध्ययन गर्यो ।
सर्टिफिकेट हातपार्यो ।
ग्रिन कार्डको लोभमा विदेशी युवतीसँग बिहे गर्यो।
सन्तान जन्मायो अनि फेरि उसलाई पनि अलपत्र पारी नेपाल फर्कियो ।
अफसोस ! उसको दिमागमा कामै नगरी,
पैसा कमाउने जुक्ति मात्रै फुर्दथ्यो ।
त्यसैले प्रवासमा पनि उ धेरैदिन टिक्न सकेन
जसको फलस्वरूप सामाजिक सञ्जालमा,
विभिन्न देशमा मजदुरी गरिरहेका,
नयाँ नयाँ अनुहारका तरुनीहरू जोड्दै गयो ।
उनीहरूलाई नक्कली प्रेम जालमा फँसायो,
अनि मोटो रकम असुल्न थाल्यो ।
फिल्म बनाउने बाहानामा,
मोटो रकम र ईज्यत अस्मिता समेत लुट्थ्यो ।
अनि उखु चुसेर मिल्काएको छोक्रा झैँ मिल्काउँथ्यो ।
उसले यही धन्दामा,
असंख्य युवतीहरूलाई शिकार बनायो ।
उनीहरूको आत्मसम्मान र भावनालाई,
जंगली झारपात झैँ कुल्च्यो ।
हो ! त्यही रक्तपिपाशु सेते,
आज फिल्मको वरिष्ठ निर्देशक भएको छ ।
फिल्म बनाउने नौटंकी गर्दै
आफ्नो हुँडारकोजस्तो पेटभर्न तल्लीन छ ।
दुनियाँको घर बिगार्दै ,घर न घाटको बनाउँदै
सोझासाझा निमुखाहरूको रगत पसिनाको कमाई खाँदै
पैसाको खेल खेल्दै ,मोज मस्तीमा रम्दै ,
सोझासाझा युवतीहरू फँसाउनमा तल्लीन छ !
सोझासाझा युवतीहरू फँसाउनमा तल्लीन छ !!
प्रकाशित मिति, २०७७ साल भाद्र २४ गते बुधबार