३०० आईएस आतंकवादीको ज्यान लिने व्यक्ति भिडन्तमा मारिए

तर मारिनुअघिसम्म साल्हीले ३०० भन्दा बढी आतंकवादीहरूलाई मारेका थिए । आफ्नो निशानाका लागि संसारभरि शेख अफ स्नाइपर्स र हक आई नामबाट प्रसिद्ध साल्हीले सन् १९७३ को अरब इजरायल युद्धमा सद्दाम हुसेनका साथ मिलेर पनि लडेका थिए ।

शनिवार साल्हीलाई बसरा शहरमा अन्तिम संस्कार गरियो । त्यस अवसरमा हजारौंले उनलाई श्रद्धाञ्जलि दिए । शुक्रवार उत्तरपश्चिम इराकको हवीजामा आईएससँग भिड्न गइरहेको बेलामा साल्ही र उनका साथीहरूमाथि आईएस आतंकवादीहरूले अचानक आक्रमण गरेका थिए ।

त्यतिखेर भएको भारी गोली हानाहानमा फसेर साल्हीको मृत्यु भयो । शिया सैनिकहरूको समूह हसद अल शाबीका प्रवक्ता अहमद अल असादीले साल्हीको मृत्युको पुष्टि गरे । साल्हीले दिनको चारजना आईएस आतंकवादीलाई मार्ने गरेको दाबी गरिन्छ । एक वर्षअघि सार्वजनिक भएको एक भिडियोमा साल्हीले स्नाइपरका रूपमा आफ्नो करीयरका बारेमा कुरा गरेका थिए । अर्को भिडियोमा उनले आईएस आतंकवादीलाई मारेको पनि देखिएको थियो ।

   एजेन्सी