अस्पतालको लापबारहीले आफन्तको मृत्यु भएका भन्दै प्रहरीमा उजुरी

दस्तावेज, आश्विन ६ गते, शुक्रबार,२०७४, दमक – छाती दुखेर उपचार गर्न आएका एक बिरामीको यहाँस्थित एक अस्पतालमा मृत्यु भएपछि मृतकका आफन्तले प्रहरीमा उजुरी दिएका छन् । एड्भान्स हेल्थ केयर सेन्टरमा उपचार गर्न आएका दमक–६ बस्ने ४४ वर्षीय नवीन रानामगरको मृत्यु भएपछि उनीहरुका आफन्तले बिरामीको मृत्युमा अस्पतालको लापर्बाहीबाट भएको भन्दै अस्पतालविरुद्ध प्रहरी कार्यालयमा उजुरी दिएका हुन् । मृतक मगर बस काउन्टर, दमकका कर्मचारी हुन् । 

औषधि गर्न अस्पताल गएका मगरको अस्पतालका स्वास्थ्यकर्मीले औषधि दिएको केहीबेरमा मृत्यु भएको पीडित परिवारले जनाएका छन् । चिकित्सकका कारणले नै बिरामीको मृत्यु भएको उजुुरी दिँदै पीडितका आफन्त प्रदर्शनमा उत्रिएका थिए । प्रदर्शनका कारण दिनभरि अस्पतालका सबै सेवा प्रभावित बन्न पुगेको थियो । मगरका आफन्त तथा परिवारले अस्पतालका कारण बिरामीको अकालमै मृत्यु भएको पीडितको उजुरीमा उल्लेख छ । 

मृतकका भाइ–बुहारी मञ्जु राईले अस्पतालका स्वास्थ्यकर्मीले गलत औषधि प्रयोग गरेकाले बिरामीको ज्यान गएको आरोप लगाउनुभयो । उनले भनिन्, “हामीलाई न्याय दिनुपर्छ, गल्ती गर्नेलाई कारबाही हुनुपर्छ ।” एड्भान्स रिसर्च सेन्टरका मेडिकल सुपरिटेन्डेन्ट डा सन्तोष सुवेदीले अस्पतालका स्वास्थ्यकर्मीका कारण बिरामीको मृत्यु नभएको दाबी गर्छन् । बिरामीलाई औषधि दिएका कारण त्यस्तो भएको होइन, मुटुको समस्याले बिरामीको मृत्यु भएको उनको भनाइ छ । 

मगरको शव परीक्षणका लागि मोरङको उर्लाबारीस्थित मंगलबारे अस्पतालमा लगिएको छ । यसैबीच, बिरामीको मृत्यु प्रकरणमा अस्पतालबाट गल्ती भएको भेटिए कानूनअनुसार कारबाही गर्ने र क्षतिपूर्ति दिने सहमति भएको छ । पीडितलाई राहत दिलाउन दुई छोरीको उच्च शिक्षासम्म अध्ययनका लागि सहयोग गर्ने तथा मृतकको स्मृतिमा ट्रष्ट खोल्ने सहमति भएको छ । 

  रासस