पहिलो चरणको स्थानीय निर्वाचन जारी, उत्साहजनक सहभागिता

वैशाख ३१, २०७४- पहिलो चरणको स्थानीय तहको निर्वाचनमा प्रदेश नं ३, ४ र ६ अन्तर्गतका ३४ जिल्लाका मतदान जारी छ । बिहान ७ बजेदेखि मतदानमा उत्साहजनक सहभािगता रहेको छ ।

 यसमा तीन प्रदेशका गरी २८३ स्थानीय तहमा छ हजार ६४२ मतदान केन्द्रमा ४९ लाख ५६ हजार ९२५ मतदाताले मतदान गर्दैछन् । मतदान साँझ ५ बजेसम्म हुनेछ । 

निर्वाचन चार महानगरपालिका, एक उपमहानगरपालिका, ९२ नगरपालिका प्रमुख उपप्रमुख तथा १८६ गाउँपालिकाका अध्यक्ष तथा उपाध्यक्षका लागि भइरहेको छ । निर्वाचनबाट कुल दुई हजार ५९८ वडामा पाँचजनाका दरले १३ हजार ५५६ प्रतिनिधि निर्वाचित हुनेछन् । निर्वाचनमा कुल ४९ हजार ३३७ उम्मेदवार चुनावी प्रतिस्पर्धाको मैदानमा उत्रेका छन् ।

निर्वाचनमा १६० महिला र १६९ पुरुष गरी ३२९ जना उम्मेदवार निर्विरोध निर्वाचित भइसकेको आयोगले जनाएको छ । प्रदेश नं १, २, ५ र ७ मा स्थानीय तहको निर्वाचन दोस्रो चरणमा अगामी जेठ ३१ गते हुँदैछ । निर्वाचन सुरक्षाका लागि नेपाल प्रहरी, सशस्त्र प्रहरी, म्यादी प्रहरी र अनुसन्धान प्रहरी गरी जम्मा ६४ हजार प्रहरी परिचालन गरिएको छ । यसबाहेक ३१ हजार नेपाली सेनाका जवानहरु  खटाएका छन् । 
       श्रोत  कान्तिपुर